Mae ymgyrch Cyfarthfa200, sy'n dathlu deucanmlwyddiant Castell Cyfarthfa ym Merthyr Tudful, wedi cyrraedd y rhestr fer ar gyfer Ymgyrch Marchnata + Cyfathrebu'r Flwyddyn yng Ngwobrau Amgueddfeydd a Threftadaeth.
Yn ystod 2025, i ddathlu pen-blwydd y parc a'r castell yn 200 oed, trefnodd Cyfarthfa200 raglen o ddigwyddiadau ac arddangosfeydd hwyliog, cyffrous ac addysgiadol i dynnu sylw at bwysigrwydd cenedlaethol a rhyngwladol safle Cyfarthfa, ac i ddathlu hanes y bobl a'r cymunedau a'i creodd. Fe’i hadeiladwyd ym 1825 fel cartref teuluol mawreddog i'r Meistr Haearn William Crawshay II, a Chastell Cyfarthfa yw un o berlau Merthyr Tudful.
Ymhelaethwyd ar ymgyrch Cyfarthfa200 gan ymgyrch farchnata ac ymgysylltu amlsianel a welodd faneri’r dathliad ar byst lampau o amgylch Merthyr Tudful, a negeseuon pen-blwydd hapus gan enwogion ac eiconau Cymreig Merthyr gan gynnwys Julien Macdonald, Steve Spiers a Ruth Jones. Mae'r ymgyrch wedi cyrraedd y rhestr fer yng nghategori Ymgyrch Marchnata + Cyfathrebu y Flwyddyn yn y gwobrau, ochr yn ochr â sefydliadau gan gynnwys yr Amgueddfa Astudiaethau Natur a'r Amgueddfeydd Rhyfel Ymerodrol.
Dan arweiniad Sefydliad Cyfarthfa a Chyngor Bwrdeistref Sirol Merthyr Tudful, daeth rhaglen Cyfarthfa200 yn fyw yn nwylo tîm Amgueddfa ac Oriel Gelf Castell Cyfarthfa, y Sefydliad, ac ystod amrywiol o sefydliadau ac unigolion lleol ar draws Parc Cyfarthfa, y gymuned leol a'r fwrdeistref ehangach.
Cyhoeddwyd manylion yr enwebeion ar y rhestr fer ar 12 Mawrth 2026 ar gyfer y Gwobrau Amgueddfeydd + Treftadaeth blynyddol a noddir gan Altair Media Ltd. Mae'r gwobrau byd-eang yn dathlu'r gorau ym myd amgueddfeydd, orielau, ac atyniadau ymwelwyr diwylliannol a threftadaeth a bydd y seremoni i ddatgelu'r enillwyr yn cael ei chynnal nos Fercher, 13 Mai 2026, yn Hilton Park Lane, Llundain.
Mae'r rhestr fer eleni, sy'n cynnwys ymgeiswyr o bob cwr o'r Deyrnas Unedig yn ogystal ag amgueddfeydd a sefydliadau diwylliannol eraill mewn 10 gwlad arall yn amrywio o Malta i Awstralia a Sbaen, wedi'u dewis gan banel annibynnol o naw beirniad, sydd i gyd yn adnabyddus ym myd yr amgueddfeydd. Mae'r rhestr fer yn adlewyrchu amrywiaeth y sector Amgueddfeydd a Threftadaeth ac yn cynnwys sefydliadau fel Amgueddfa Fitzwilliam a Thŷ Jane Austen yn ogystal ag amgueddfeydd cenedlaethol fel yr Amgueddfa Astudiaethau Natur ymhlith y 19 categori.